കനൽ ഒരുക്കുന്നത്

 കനൽ ഒരുക്കുന്നത് 

എന്നെ കെട്ടിയവൻ രാത്രിയെന്റെ 

ശരീരത്തെ ഭോഗിക്കുമ്പോൾ 

ഞാൻ കടൽത്തീരത്ത് , അവനെ 

കാത്തിരിക്കുകയാവും 

വേലിയെറിയുമിറങ്ങിയും  വക്കിടിഞ്ഞ 

മണലിറമ്പു പോലെ ഞാൻ കാത്തിരുന്നു 

എന്റെ കൈപിടിച്ച് കൊടുക്കാൻ, അവ -

നൊരു ആണാണെന്നു തെളിയിക്കാൻ 

കടലിൽ പോയൊരു വമ്പൻ സ്രാവിനെ 

പിടിക്കാനച്ഛൻ പറഞ്ഞുവിട്ടതാണവനെ 

കേട്ടപാതി കേൾക്കാത്തപാതി അവൻ 

വലയും  വള്ളവുമെടുത്തിറങ്ങി 

നീ ആണാണെന്നു തെളിയിക്കാൻ 

കടലിലേക്കല്ല,യെന്നിലേക്കാണ് ഇറങ്ങേണ്ടതെന്നു 

ഞാനവനോട് പറഞ്ഞില്ല 

പറഞ്ഞാലുമവൻ കേൾക്കില്ല 

ഇനി ചൂണ്ടയിൽ സ്രാവിനെ കൊളുത്തി 

പൗരുഷത്തിന്റെ കൊടികുത്തിയ 

വള്ളംതുഴഞ്ഞു വന്നതിനെയച്ഛന്റെ 

മുന്നിലേക്കെറിഞ്ഞു കൊടുത്താലെ 

അവനിലെ ആണുണരൂ 

അവൻപോയയുടനെ 

അച്ഛൻപറഞ്ഞെന്നെ കെട്ടിയവൻ 

ചൂണ്ടയിൽ കൊളുത്തിയെന്നെ വലിച്ചത് 

ഈ മണൽക്കരയിലൂടെയാണ് 

എന്നെ കെട്ടിയവന് കരയിൽ 

ചൂണ്ടയിട്ട് ഇരയെ പിടിക്കാനെയറിയൂ 

അയാളുടെ ഉയർന്ന കൊടിയെന്നുമിറങ്ങുന്നത് 

എന്റെ ശരീരത്തിലൊരിടത്താണ് 

എങ്കിലുമെന്നെങ്കിലും ഒരിക്കൽ 

വള്ളംനിറയെ  സ്രാവുമായവൻ 

വരുമ്പോൾ, കരയിൽ വഴികാട്ടാനാണ് 

ഞാനെന്നും കണ്ണിൽ തീയെരിച്ചിരിക്കുന്നത് 

ഇടയ്ക്കെനിക്ക് കൂട്ടായി നിലാവ് വരും 

എന്റെയീ യാത്രകളൊന്നുമെന്നെ 

ഭോഗിക്കുന്നവൻ അറിയാറില്ല,യെങ്കിലും 

പുലരിപിറക്കുമുമ്പേ ഞാൻതിരികെയെത്തി 

തുടവിടർത്തി കിടക്കുന്നവളിലേക്കു തിരിച്ചുകയറും 

അപ്പോളവളുണർന്ന് മുഖം കഴുകി 

അടുക്കളയിൽ ചെന്നടുപ്പു  കത്തിക്കും 

ഇതുവരെ പിടികൊടുക്കാത്ത 

സ്രാവുമായൊരിക്കലവൻ  വരുമ്പോൾ 

ഉപ്പും മുളകുമിട്ട് ചുട്ടെടുക്കാൻ 

ഈ തിണ്ണയിൽ ഇലയിട്ട് 

ജീവിതത്തിന്റെ രുചിയറിയാനാണ് 

ഞാനെന്നും അടുക്കളയിലാണെങ്കിലും 

ചാരത്തിൽ മൂടിയാണെങ്കിലും 

ഒരുപിടികനലെന്നുമീ 

ഹൃത്തിലൊളിച്ചു പിടിക്കുന്നത്