ക്യാ തേങ്ങാ bunch!!! / കരിയിലയും മണ്ണാങ്കട്ടയും

    

ക്യാ തേങ്ങാ bunch!!!

 

ഞങ്ങളുടെ കാവൽക്കാരൻ മലയാളിയാണ്

പറമ്പിലെ പണിക്കാരൻ ഹിന്ദി പറയുന്ന ബംഗാളിയും

എങ്കിലും ഭാഷയുടെ അതിർവരമ്പുകളൊന്നുമില്ലാതെ അവർ സംവദിക്കും

'ഇന്നലെ ബാരിഷ് ? കാവൽക്കാരൻ ചോദിക്കും

കൽ ബഹുത് മഴ ,ബംഗാളി ഉത്തരം പറയും

' ഇന്ന് ക്യാ കാം ' സംഭാഷണം നീളും

ആജ് തേങ്ങാത്തടം ഉത്തരം ലളിതമാകും

അക്ഷരത്തിന്റെയും ലിപിയുടെയും സങ്കീർണതകളില്ലാതെ അവർ പരസ്പരം മനസ്സിലാക്കും

ഭാഷ തടസ്സമാകാത്ത അവരുടെ സൗഹൃദം കാണുമ്പോൾ ഞാനോർക്കും

ഡിഗ്രിക്കു ഇംഗ്ളിഷിനു മാർക്ക് കുറഞ്ഞതുകൊണ്ടാണ് പഠിത്തം നിർത്തിയത്

ഭാഷമോശം എന്ന് പറഞ്ഞാണ് മാസിക കവിത തിരിച്ചയച്ചത്

ക്യാ തേങ്ങാ bunch!!!

കരിയിലയും മണ്ണാങ്കട്ടയും

കാറ്റത്ത് കരിയിലയക്ക്  മണ്ണാങ്കട്ട കൂട്ട്

മഴയത്ത് മണ്ണാങ്കട്ടയ്ക്ക് കരിയിലയും

കഥ കേട്ട് ഉണ്ണിക്കുട്ടന്റെ കണ്ണുകൾ തിളങ്ങി

അതിൽ സഹൃദത്തിന്റെ സൗന്ദര്യം മിന്നി

കാറ്റും മഴയുമൊന്നിച്ചു വരുന്ന 

ദിവസങ്ങളെക്കുറിച്ച് ഉണ്ണിക്കുട്ടന്നറിയില്ലായിരുന്നു

ഇനി വന്നാലും കാറ്റത്ത് അമ്മയുടെ വിരലുണ്ടല്ലോ

മഴയത്ത് അമ്മയുടെ മാറുണ്ടല്ലോ

അമ്മയല്ല ലോകമെന്നു തിരിച്ചറിയുമ്പോഴാണ്

ഉണ്ണിക്കുട്ടന്റെ കഥകളൊക്കെ കെട്ടുപോകുന്നത്