വാത്മീകിയും വോളിനിയും

 

വീടു വൃത്തിയാക്കുമ്പോൾ

അമ്മയുടെ രാമായണത്തിനിടയിൽ

വോളിനിയുടെ ഒരു ട്യൂബ്.

മനസ്സിന്റെ പിരിമുറുക്കം കുറയാൻ

അമ്മ രാമായണം വായിക്കുന്നു.

ശരീരം കടയുമ്പോൾ പേശികളിൽ

വോളിനി പുരട്ടുന്നു.

വാത്മീകിയും വോളിനിയും

കൈക്കോർത്തിരിക്കുന്നത് കണ്ടപ്പോൾ

എന്റെ മനസ്സിന്റെ മുറുക്കങ്ങൾ അയഞ്ഞു

 

പൊരുളുകൾക്കെന്താഴം !!

 

ഒരല്പം കുഴിച്ചപ്പോൾ തന്നെ

ഉറവയുണർന്നു, നീരു പൊടിഞ്ഞു.

ആദ്യം കലങ്ങി കലഹിച്ചവ പിന്നെ

പതിയെയൂറി തെളിഞ്ഞു.

കുറച്ചു കൂടിയാഴമാവാം, മുത്തശ്ശൻ പറഞ്ഞു.

നീരു തെളിഞ്ഞില്ലേ,യിനിയെന്തിതെന്ന്

എന്നിലെ അക്ഷമനായ സന്ദേഹി.

എനിക്കും നിനക്കും കോരിയെടുക്കാനിതു മതി

ഒരല്പം കൂടി കുഴിച്ചാൽ ഇനിയിതു

വഴി വരുന്നവർക്കുമൊരു കരുതലാവും

മുത്തശ്ശൻ്റെ,

സന്ദേഹമില്ലാത്ത മൊഴി

പഴമയുടെ പൊരുളുകൾക്കെന്താഴം !!