ഉൾവാതിലിന് വല്ലാത്ത ഞെരുക്കം.
തുറക്കാനുമടയ്ക്കാനും ബലം.
എണ്ണയിട്ടു, വിജാഗിരി മാറ്റി
എന്നിട്ടും, തുറക്കുമ്പോൾ
അത് പ്രതിഷേധിച്ചു.
"എപ്പോഴുമുള്ളിൽ തന്നെ
അടച്ചിരുന്നിട്ടാണ്.
ഇടയ്ക്കെങ്കിലും തുറക്കണം
നാലാളെ വിളിച്ചകത്തു കയറ്റണം", വിദഗ്ധൻ പറഞ്ഞിട്ടും മനസ്സനുവദിച്ചില്ല.
ഒടുവിൽ, തുറക്കാതെ തുരുമ്പിച്ചയുള്ളം മാറ്റിവെച്ചു.
പുതിയ സാങ്കേതിക വിദ്യയാണ്.
തുറന്നിട്ടാൽ താനെയടയും
താക്കോൽ എപ്പോഴും കൈയിൽ വേണം.
ഇന്ന്,മഴ കണ്ട ആഹ്ളാദത്തിൽ
വാതിൽ തുറന്നിറങ്ങി
താക്കോൽ മറന്നു
വാതിലടഞ്ഞു
എന്നിൽ നിന്നും ഞാനും
പുറത്തായി
No comments:
Post a Comment