വാക്കുകൾ

വാക്കുകൾ
എല്ലാം പതുക്കെയായിരുന്നു
ആദ്യം പിടി മുറുക്കിയത് വാക്കിലാണ്
വെട്ടിയും, കുറച്ചും, ഗുണിച്ചും, ഹരിച്ചും
ആറ്റിക്കുറുക്കിയും ഇനി ഒരു
പിടി വാക്കുകൾ മതിയെന്ന് തീരുമാനിച്ചു
പല വിധത്തിൽ പൊതിഞ്ഞവ
വാക്കുകളുടെ സൂപ്പർ മാർക്കറ്റിലൂടെ വില്കപ്പെട്ടു
ഉപ്പും, മുളകുമില്ലാതെ രുചി ചോർന്നവ
പഞ്ചസാരയുടെ മധുരമില്ലാത്തവ
എത്ര തിളപ്പിച്ചിട്ടും വേവാത്തവ
കലത്തിലിട്ടു വാർത്തെടുക്കുമ്പോൾ
പരസ്പരം ചേരാതെ വേറിട്ട് നില്കുന്നവ
വെളിച്ചെണ്ണയിൽ വറുക്കുമ്പോൾ പൊട്ടാത്തവ
എത്ര മുറിച്ചുനോക്കിയിട്ടുമുള്ളിൽ
ഒരു വിത്ത് പോലും കാണാത്തവ
തോട് പൊട്ടിക്കുമ്പോൾ ഉള്ളിലെ
മഞ്ഞക്കരു ചീഞ്ഞവ
സോപ്പ് പോലെ വെറുതെ പതയുന്നവ
നെഞ്ച് ഊതി , കനലെരിച്ചു ഞാനൊരുക്കുന്ന
അടുക്കളയിൽ ഈ വാക്കുകൾ പോരാ
ഒഴിഞ്ഞ സഞ്ചിയുമായി ഞാൻ ഇറങ്ങുന്നു
തിരികെ പോവും വഴി, ഇടവഴിയിലെങ്ങാനും
ഒരു കൈപ്പവല്ലി , കാറ്റിലാടും
ഒരു നെൽക്കതിർ, ഒരു മുറി തേങ്ങാ
വേലിക്കരികിൽ കാന്താരിയുടെ ഒരു മൊട്ട്
മോഹമടങ്ങാത്ത മനസും ,
രുചികെടാത്ത രസ്നയും മാത്രം
ബാക്കിയാവുന്നു

രാജേഷ് ആത്രശ്ശേരി